Монгол, Энэтхэгийн Гадаад харилцааны яам хоорондын V зөвлөлдөх уулзалт 2025 оны 3 дугаар сарын 19-ний өдөр Бүгд Найрамдах Энэтхэг Улсын нийслэл Шинэ Дели хотноо болов.

Монгол, Энэтхэгийн Гадаад харилцааны яам хоорондын V зөвлөлдөх уулзалт 2025 оны 3 дугаар сарын 19-ний өдөр Бүгд Найрамдах Энэтхэг Улсын нийслэл Шинэ Дели хотноо болов.

Зөвлөлдөх уулзалтыг Гадаад харилцааны яамны Төрийн нарийн бичгийн дарга Л.Мөнхтүшиг болон Энэтхэг Улсын Гадаад хэргийн яамны Зүүн Азийн асуудал эрхэлсэн Нарийн бичгийн дарга Ш.Ж.Мазумдар нар ахлав.

Уулзалтын эхэнд Төрийн нарийн бичгийн дарга Л.Мөнхтүшиг Монгол Улсын “оюун санааны хөрш”, бүс нутаг дахь чухал түнш бөгөөд “гуравдагч хөрш” Энэтхэг Улстай хөгжүүлж буй Стратегийн түншлэлийн харилцааг гүнзгийрүүлэхэд манай улс өндөр ач холбогдол өгдөг болохыг тэмдэглэв.

Талууд Монгол, Энэтхэгийн улс төр, худалдаа, эдийн засаг, уул уурхай, мэдээллийн технологи, боловсрол, соёл зэрэг салбарын болон бүс нутаг, олон улсын тавцан дахь хамтын ажиллагааны өргөн хүрээний асуудлыг хэлэлцэж, 2025 онд тохиож буй хоёр улсын хооронд дипломат харилцаа тогтоосны 70 жилийн ойг ёслол төгөлдөр тэмдэглэн өнгөрүүлэх хүрээнд хэрэгжүүлэх дээд, өндөр түвшний айлчлал, арга хэмжээний талаар санал солилцов.

Манай хоёр улс хамтран хэрэгжүүлж буй төсөл, хөтөлбөрүүдийн бүтээн байгуулалт эрчимтэй өрнөж буйг талууд тэмдэглээд Монгол Улсын Засгийн газрын 14 мега төслийн нэг бөгөөд Монгол, Энэтхэгийн харилцааны бэлгэ тэмдэг болсон Газрын тос боловсруулах үйлдвэрийг төлөвлөсөн хугацаанд ашиглалтад оруулах чиглэлээр цаашид нягт хамтран ажиллахаар тохиров.

Талууд НҮБ болон олон улсын байгууллагын хүрээнд үргэлжлүүлэн харилцан бие биеэ дэмжин хамтран ажиллахаа илэрхийлэв.